Про яйця

Прилетіло из неба яйце
Та паскудно ня гупнуло в груди!
Впав, ги снуп, і поблідло лице...
Што зо мнов учинили злі люди!
Адські мукы терпів уд яйця,
Што у мене злодійськьі ся верло,
Недалеко уже й до кунця,
Темно в очох и дыхания сперло.
Бє у мозок майсильно, чим спирт,
Я вже нигда не буду здоровый;
У Кощея Бессмертного смирть
Тоже спрятана была в яйцьови.
Много капельниць я схосновав,
Через тыждинь засербав лиш супу;
З коштурами на ногы устав,
Дохторы вже оформили группу.
Вже до смерти не йзім я омлет,
Рокот-крумплі и ратоту тоже;
З холодильника увержу гет
Што лиш мало на яйця похоже.
Левеш курячий уллю я вон,
(Бо з яиць ся улуплюют кури!)
Вер бы й криймеші через балкон
Майонез бы за ними ак шпурив.
Вы до мене не йдіт из яйцьми!
Вас до хижі из ними не пущу —
Кидь сьірі — то притрощу дверьми,
А варині — узьму та облущу.
Терористи мині не страшні,
Я послав бы й Бен Ладена матом,
Годні бомбы метати мині,
Лиш бы яйця не сміли метати!