Спалені чіжми

Горіли чіжмы гумійові,
Летів до неба чорний дым;
Служити были вы готові,
Коли ще бов я молодым.
Типирь такі уже не в моді,
Завто й попали у огинь —
На вас не злакомиться й злодій,
Вас не обув бы й циганин.
Вы фурт ходили на природу,
Но не до церкви вадь на бал;
Не пропускали в штрімфлі воду,
Місили сміло всякий кал.
Вы знали глину, кал, болото,
Айбо й не чули про паркет;
Я часто й босий бов на фото,
Но в гумійовіх чіжмах — нєт.
До хыж не йшли, лиш до гарадич,
Майдале путь бов для папуч,
Вам у дождьови бов я радий
Из паров цуравых онуч.
На сонцю ж мали чисть сондалы,
Бокончі — у морозний час;
Из кефов вас не боксовали,
И не світили ряндов вас.
Щи добре, кидь узявши копач,
Издолю вас я пошкребтав!
Май часто просто в камінь копав,
Обы тот леп самий удпав.
Нові фізловані топанкы
Ишли на танці, до дівок;
Не раз, вертаючися з п’янкы,
Самі топтали свуй шнурок.
Попуд постилями чужими
Не вы стояли, ай они...
И пуд кониць вы заслужили
На нич згоріти у огни?!
А што бы вы хотіли? Правды?
Її ниє й меже людьми.
Из нив и сам давно пропав бы,
А без — попробуй ня ими.
Топанкы кидь ся й просукали,
То у смітя бы-м їх ни вер —
Щи каждий динь бы ся вбували:
На двур, в бударь, або на керт.
А вам ниє такої чести,
Держати де вас?
Хлів — не склад.
Хотів-им вас в музей понести,
Та завернули ня назад.
Протерта талпа, бук роздертий,
Течут кругом, ги решето,
Хоть на асфальті вы бы смерти
Ищи не знали году й сто.
Така у вас судьба-поганка!
Быває и в людий така —
Один подобний до топанка,
А другий май до гумака.
Не всім, як птицям у польоті
Прожити суджено рокы:
Многі? навхтема у болоті,
Як гумійові чіжемкы.
Одных почистят — тай у ладу,
Ги в Мавзолей їх покладут,
А другых вержут дись иззаду
Та и забудут через гуд.
Тот нігда ся нігде не рушит -
Без шарка став ун інвалід,
А тот, ліплений, ще послужит,
Хотя й на пенсії, вже дід.
Адам и Єва уйшли босі,
Як книга пише, из Рая;
Пув-світа ходит так и досі,
Меже обутых хожу я.
Айбо колись у зимлю ляжу,
(Ото нікого не мине),
И чувствую — на чорну сажу
Перепалят чорти мене.
Ще докі всі живі-здорові,
Йсе не держіт у голові!
Згоріли чіжмы гумійові...
Иду та куплю си нові.

Додати коментар

Увага! Наші коментарі модеруються. КОЛИБА вже багато років місце толерантності і ввічливості, тому ми залишаємо за собою право видаляти грубощі, неконструктивну критику і коментарі, що розпалюють міжнаціональну ворожнечу. Дякуємо.

Захисний код
Оновити